“Ўзбекнефтегаз” ва Honeywell UOP қўшма лойиҳаларни амалга ошириш жараёнларини муҳокама қилдилар
Тошкент. 13 сентябр. ЎзТАГ – “Ўзбекнефтгаз” АЖда Honeywell UOP компанияси (АҚШ) делегацияси билан ҳамкорликни ривожлантириш истиқболларини муҳокама қилиш бўйича учрашув бўлиб ўтди, деб хабар беради Ўзбек телеграф агентлиги (ЎзТАГ).
“Ўзбекнефтгаз” АЖ матбуот хизматидан маълум қилишларича, Honeywell UOP Хитойда Wison муҳандислик компанияси билан биргаликда бир нечта МТТ лойиҳаларини амалга оширган.
Ўзбекистон президентининг 2018 йилнинг 16 май куни АҚШга давлат ташрифи доирасида “Ўзбекнефтгаз” АЖ Honeywell UOP компанияси ўртасида Англашув меморандуми имзолаган эди. Ҳужжатда МТТ технологиясидан фойдаланган ҳолда табиий газдан олефинларни ишлаб чиқариш бўйича лойиҳа доирасида қўшма фаолиятни ташкил қилиш кўзда тутилган.
Wison Engineering Ltd компанияси бешта МТТ ускунасини муваффақиятли ишга туширган бўлиб, 2019 йилнинг биринчи чорагигача учта МТТ ускунаси фойдаланишга топширган ва яна қолган учтаси қурилиш босқичида.
Музокаралар доирасида Хитойда МТТ технологияси бўйича лойиҳаларни амалга оширишда катта тажрибага эга бўлган Wison Engineering Ltd компаниясининг тақдимоти ҳам ўтказилди.
Хориж томонининг таъкидлашича, Honeywell UOP компанияси ва Wison Engineering Ltd 10 йилдан зиёд вақт мобайнида Хитойда МТТ лойиҳалари бўйича ҳамкорлик қилиб келмоқда.
Музокаралар якунлари бўйича Wison Engineering Ltd компанияси Honeywell UOP компаниясига олефинлар ва кимёвий маҳсулотлар ишлаб чиқариш МТТ лойиҳаси бўйича техник-тижорат ҳисоботини ишлаб чиқишда ёрдам беришига келишиб олинди.
Сурат манбаи: из https://www.uzdaily.uz
