“Ўзсаноатқурилишбанк” ва KfW IPEX-Bank 100 млн евролик қарз келишуви имзоладилар

Тошкент. 18 май. ЎзТАГ –“Ўзсаноатқурилишбанк” Акционерлик тижорат банки Германиянинг KfW IPEX-Bankи билан 100 миллион евролик банклараро кредит битимини имзоладилар, деб хабар беради Ўзбек телеграф агентлиги (ЎзТАГ).

“Ўзсаноатқурилишбанк” АТБ матбуот хизматининг маълум қилишича, битимнинг мақсади тадбиркорлик субъектларини қўллаб-қувватлаш ҳамда Европа мамлакатларидан юқори технологик ускуналар, товарлар ва хизматлар импортини молиялаштиришдан иборат.

Мазкур битим доирасидаги лойиҳалар Euler Hermes, SERV, SACE сингари экспорт кредит агентликлари кафолати асосида 10 йил муддатгача молиялаштирилади.

Эътиборлиси, мазкур кредит линияси давлат кафолатини тақдим этиш борасидаги механизмсиз жалб қилинган.

Эслатиб ўтамизки, “Ўзсаноатқурилишбанк” АТБ Германиянинг Commerzbank AG, Landesbank Baden-Württemberg ва бошқа молия ташкилотлари билан фаол ҳамкорлик алоқаларини ўрнатган ҳамда ушбу ҳамкорларнинг кредит линияларини иқтисодиётимизнинг нефть ва газ, кимё, автомобилсозлик саноати корхоналарини ва кичик бизнес субъектларининг турли инвестицион лойиҳаларини молиялаштиришга йўналтириб келмоқда.

KfW IPEX-Bank Германиянинг KfW Group банклари гуруҳи аъзоси сифатида Германия давлати ва унинг ташқарисида экспортни ва лойиҳаларни молиялаштириш билан шуғулланади. Охирги 10 йилда KfW IPEX-Bank 3 мингдан ортиқ лойиҳаларни молиялаштирган ва ушбу банк томонидан тақдим қилинган кредитлар миқдори 143 млрд евродан ортиқни ташкил қилган.

Сурат манбаи: http://thesincuragroup.com/financial.html