Футзал бўйича Ўзбекистон терма жамоаси Осиё чемпионатининг “бронза” медалини қўлга киритди

Тошкент. 12 май. ЎзТАГ – Футзал бўйича Ўзбекистон миллий терма жамоаси учинчи ўрин учун баҳсда Кувайт терма жамоаси устидан ғалаба қозонди, дея хабар беради Ўзбек телеграф агентлиги (ЎзТАГ).
“Бронза медаль учун бўлган баҳсда Қувайт футзалчилари 2:1 ҳисобида мағлубиятга учратилди. Аммо ушбу натижа майдондаги кучлар нисбатини акс эттирмайди. Бизнинг жамоа анча кучли эди, лекин ўйинга Эрон термасига 10:0 ҳисобидаги мағлубият таъсир қилди”, деб таъкидлашди мамлакат Футзал ассоциациясида.
“Бу футзалчилар бизнинг келажагимиз. Уларни ҳозирдан бошлаб икки йилдан сўнг бўлиб ўтадиган Осиё чемпионатига тайёрлаяпмиз. Айнан ўша мусобақага жиддий тарзда тайёргарлик кўрилиши керак, чунки 2 йилдан сўнг Осиё чемпионатининг ярим финалчилари қаторига кириш ва Жаҳон чемпионати йўлланмасига эга бўлиш, бизнинг асосий вазифаларимиздан бири”, - деди Ўзбекистон Миллий терма жамоаси мураббийи Баҳодир Аҳмедов.