Инха Университетида Google конференцияси бўлиб ўтади

Тошкент. 18 май. ЎзТАГ – 19 май куни Тошкент шаҳридаги Инҳа университетида (IUT) тўртинчи маротаба “Google I/O Extended” конференцияси ўтказилади, деб хабар беради Ўзбек телеграф агентлиги (ЎзТАГ).

Олий таълим муассасасининг матбуот хизматидан маълум қилишларича, форум бу йил биринчи маротаба IUT талабалари томонидан 2018 йилнинг февраль ойида ташкил этилган “Google Developer Groups (GDG)” томонидан ўтказилади.

“Google I/O Extended 2018 IUT” конференцияси Ўзбекистондаги IT-ҳамжамиятни жалб қилади ҳамда уларни “Google” компаниясининг энг долзарб инновацион ечимлари концепциялари билан таништиради. Конференцияда Ўзбекистондаги турли университетларнинг 200 нафардан ортиқ талабалар ҳамда ишлаб чиқарувчилар иштирок этиши кутилмоқда.

Эслатиб ўтамизки, ҳар йили ўтказиладиган Google I/O конференцияси асосан дастурий таъминот яратувчиларига мўлжалланган бўлиб, “Google” компанияси томонидан ўтказилади ҳамда “Google”нинг Android, Chrome, Chrome OS, Google APIs, Google Web Toolkit, App Engine ва бошқалар каби очиқ технологиялари ва сервисларининг муҳокамасига бағишланган.

Сурат манбаи: https://www.adnanguney.com/?s=back+to+top