“Локомотив” Осиё чемпионлар лигаси чоракфиналининг биринчи учрашувида дуранг ўйнади

Тошкент. 24 август. ЎзТАГ – Пойтахтнинг “Локомотив” жамоаси Осиё чемпионлар лигаси чоракфиналининг биринчи учрашувида БААнинг “Ал-Айн” жамоаси билан 0:0 ҳисобида дуранг ўйнади, деб хабар беради Ўзбек телеграф агентлиги (ЎзТАГ).

“Ҳар икки жамоа хужумкор футбол намойиш этди. Ташаббус мезбонлар тарафида бўлди, ўзбекистонликлар эса қарши хужумларда ўйнадилар. Темирйўлчилар биринчи ва иккинчи таймларда камида икки мартадан 100%лик имкониятларга эга бўлдилар”, - деб таъкидлашди клуб матбуот хизматида.

Жамоалар орасидаги жавоб ўйини 13 сентябрда Тошкентда бўлиб ўтади.

“Локомотив” Ўзбекистоннинг Осиё чемпионлар лигаси плей-офф босқичига чиққан ягона жамоасидир. Бунинг устига клуб нафақат гуруҳда 1-ўринни олди, балки бирон марта ҳам мағлубятга учрагани йўқ.