Швейцария банки Ўзбекистонда НҚИЗ қурилишини молиялаштириши мумкин

Тошкент. 14 сентябр. ЎзТАГ – Credit Suisse Швейцария банки Ўзбекистонда янги нефтни қайта ишлаш комплекси қурилишини молиялаштириши мумкин, деб хабар беради Ўзбек телеграф агентлиги (ЎзТАГ).

Бу ҳақида “Ўзбекнефтегаз” АЖда швейцар банки вакиллари билан ўтказилган учрашувда сўз борди. Унда банкнинг ўзбек ширкати амалга ошираётган инвестиция лойиҳаларини молиялаштиришда иштироки масаласи муҳокама қилинди. “Ўзбекнефтегаз” АЖ томонидан компания фаолияти, нефтегаз саноатида амалга ошираётган инвестиция лойиҳалари, тармоқ ва умуман, мамлакатдаги ислоҳотлар ҳақида маълумот тақдим этилди.

Банк вакиллари “Ўзбекнефтгаз” АЖнинг мамлакат иқтисодиёти ривожланишида муҳим ўрин тутувчи инвестицион лойиҳаларини молиялаштиришга алоҳида қизиқиш билдираётганларини таъкидлаб ўтдилар.

Шу билан бирга, банк вакилларининг сўзларига кўра, ушбу иштирок нафақат тижорат мақсадини кўзлайди, балки Credit Suisse банкининг “Ўзбекнефтгаз” АЖ билан узоқ муддатли ҳамкорликни кўзда тутувчи стратегик муносабатларнинг ўрнатилишига хизмат қилади.

“Учрашув якунлари бўйича Шўртан ГККнинг ишлаб чиқариш қувватларини кенгайтириш ва янги нефтни қайта ишлаш заводини қуриш бўйича инвестицион лойиҳаларни молиялаштириш имкониятларини биргаликда кўриб чиқиш бўйича келишувга эришдилар”, - дейилади компания сайтида эълон қилинган маълумотда.

 

Сурат манбаи: из http://www.ung.uz