sports.uz сайти футбол ҳақида видеороликлар конкурсини ўтказмоқда
Тошкент. 3 март. ЎзТАГ– Ўзбекистондаги спорт маълумотлари бўйича оммавий сайтлардан бири бўлган sports.uz футбол бўйича Олий Лига ва Биринчи Лига янги мавсуми олдидан видеолавҳалар танловини эълон қилди, деб хабар беради Ўзбек телеграф агентлиги (ЎзТАГ).
“Барчамизга маълумки, сўнгги йилларда Ўзбекистонда спорт жадаллик билан ривожланиб бормоқда ва юртимиз спортчилари Осиё ва жаҳон ареналарида шоҳсупанинг энг юқори ўринларидан жой эгаллаб келишмоқда”, - деб таъкидланади хабарда.
Спортчиларимизнинг қитъа ва жаҳон ареналарида ҳамда республикамизнинг барча ҳудудларида бўлиб ўтаётган мусобақа ва тадбирларни ёритишни мақсад қилган SPORTS.uz интернет-портали, - дейилади шундан кейин, - футбол бўйича “Олий Лига ва Биринчи Лиганинг энг яхши видеолавҳалари” танловини эълон қилади.
Танловга жўнатилаётган видеороликлар қуйидаги шартларга жавоб бериши керак. Яъни Олий лига ва Биринчи лига учрашувларида олинган бўлиши, давомийлиги минимал 30 сониядан 1 дақиқагача бўлиши ва эфир этикасидан четга чиқмаган бўлиши зарур.
Олган видеолавҳаларингизни телеграм ижтимоий тармоғи орқали (@sportsuz_video манзилига юбориш керак.
Юборилган видеороликлар сайт ва унинг расмий ижтимоий тармоқларида муаллиф номи билан эълон қилиниб борилади. Ҳар ой сўнггида эса энг яхши видеолавҳалар муаллифлари махсус эсдалик совғалари билан тақдирланади.
