Тошкентга Берлин Қироллик кутубхонаси турк қўлёзмаларининг ноёб каталоги етиб келди

Тошкент. 20 июл. ЎзТАГ – Ўзбекистон Миллий кутубхонаси фонди “Берлин Қироллик кутубхонаси турк қўлёзмалари каталоги” билан бойиди, деб хабар беради Ўзбек телеграф агентлиги (ЎзТАГ).

Кутубхонадан хабар беришларича, каталог 1889 йилда “A.Asher & CO” нашриёти томонидан чоп этилган бўлиб, XI асрдан бошлаб хронологик тарзда йиғилган турк адабиёти рўйхатидан иборат. Нашр Ўзбекистонга Берлин Давлат кутубхонаси томонидан совға қилинди.

Каталог муаллифи Вильхельм Перч ҳар бир асарнинг хусусиятларини баён этиб, унинг Берлин Қироллик кутубхонасидаги турган жойи ҳамда асар бошланган сўзларни келтиради. Араб ва форс сўзлари араб шрифтида, турк тилида талаффуз қилинадиган тартибда кўрсатилган.

Каталог энциклопедия ва библиография, дин ва ҳуқуқ, философия, мақоллар, санъат космография ва география, математика, астрономия, сиёсат, статистика, ботаника, поэзия, ҳикоялар мавзуларига бўлинган.

Хусусан, поэзия ва ҳикоялар бўлимларида тузувчи муаллифлар исми-шарифларини алфавит тарзда келтиради ва уларнинг Европада энг таниқли цитаталарини келтиради.

Каталог Ўзбекистон Миллий кутубхонасининг ноёб Қўлёзмалар Фондида сақланади.