Ўзбекистон ва Қирғизистон президентлари ОАВ вакиллари билан учрашдилар
Тошкент. 14 декабр. ЎзТАГ – Ўзбекистон ва Қирғизистон президентлари Шавкат Мирзиёев ва Сооронбой Жээнбековлар ОАВ вакиллари билан учрашдилар, деб хабар беради Ўзбек телеграф агентлиги (ЎзТАГ).
“Оммавий ахборот воситалари вакиллари билан учрашувда Президентлар музокаралар ўзаро англашув, очиқлик ва самимият руҳида, ишчан кайфиятда ўтганини, эришилган келишувлар икки халқ манфаатларига хизмат қилишини таъкидладилар. Шавкат Мирзиёев Қирғизистон Президентининг биринчи ташрифи чоғида имзоланган ҳужжатлар халқларимизнинг талаб ва истакларидан келиб чиқиб қабул қилингани, улар мамлакатларимиз ўртасидаги дўстлик ва ҳамкорликни янада ривожлантиришда муҳим омил бўлишини қайд этди. Сооронбой Жээнбеков эришилган келишувлар халқларимиз кутган воқеа бўлганини, ўзаро муносабатлар тарихида қоладиган шундай хайрли ишларга ҳисса қўшганидан мамнун эканини таъкидлади”, - дейилади давлат раҳбари матбуот хизматининг хабарида.
Маълумки, Қирғизистон Республикаси собиқ президенти Алмазбек Атамбаев икки томонлама муносабатларни ривожлантириш йўлидаги улкан хизматлари учун Ўзбекистон Республикаси Президенти Шавкат Мирзиёевни “Данакер” ордени билан мукофотлаган эди. Қирғизистоннинг олий мукофотларидан бўлган ушбу орден халқлар ўртасида тинчлик, дўстлик ва ҳамкорликни мустаҳкамлашга, миллатлараро тотувликни сақлашга, илм-фанни ривожлантиришга, миллий маданиятларни яқинлаштириш ва бойитишга катта ҳисса қўшган инсонларга берилади. Кўксарой қароргоҳида Қирғизистон Республикаси Президенти Сооронбой Жээнбеков Ўзбекистон Республикаси Президенти Шавкат Мирзиёевга “Данакер” орденини тантанали равишда топширди”, - дейилади хабарда.
Таъкидланишича, Қирғизистон Республикаси Президенти Сооронбой Жээнбековнинг мамлакатимизга расмий ташрифи давом этмоқда.
Сурат манбаи: http://planetasmi.ru/za-rubezhom/46572-uzbekistan-ustanovlen-poryadok-akkreditatsii-inostrannykh-smi-na-vybory-prezidenta
