Ўзбекистон 2025 йилга бориб тўқимачилик маҳсулотлари экспортини $7 млрдга етказишни режалаштирмоқда

Тошкент. 13 феврал. ЎзТАГ – Ўзбекистон 2025 йилга бориб тўқимачилик маҳсулотлари экспортини $7 млрдга етказишни режалаштирмоқда, деб хабар беради Ўзбек телеграф агентлиги (ЎзТАГ).

Бу президентнинг 12 февралдаги “Тўқимачилик ва тикув-трикотаж саноатини ислоҳ қилишни янада чуқурлаштириш ва унинг экспорт салоҳиятини кенгайтириш чора-тадбирлари тўғрисида​”ги қарори билан кўзда тутилган.

“Ўзбекистон Республикаси Вазирлар Маҳкамаси уч ой муддатда 2019-2025 йилларда тўқимачилик ва тикув-трикотаж саноатини жадал ривожлантириш Концепциясини тасдиқласин. Мазкур концепция республикада ишлаб чиқариладиган пахта ип-калаваларнинг бутун ҳажмини қайта ишлаш ҳисобига 2025 йилга бориб тўқимачилик маҳсулотлари экспорти ҳажмини $7 млрдга етказишни кўзда тутсин”, - дейилади ҳужжат матнида.

Бундан ташқари, концепция комплекс ёндашув асосида хом ашёни қайта ишлаш, тайёр маҳсулотни, шу жумладан, саноат кооперациясини кенгайтириш ҳамда қўллаб-қувватлаш асосида ишлаб чиқариш ва экспорт қилиш, тўқимачилик маҳсулотларини сотишнинг ички ва ташқи бозорларини тадқиқ қилиш, шунингдек, ички ва ташқи бозорларда маҳсулотлар рақобатбардошлигини таъминлаш бўйича чора-тадбирларни амалга ошириш, қўшимча қиймат яратишнинг ягона занжирини тузишни ҳам ўз ичига олади.

Сурат манбаи: 500px.com