Ўзбекистон тўқимачилик бўйича йиллик халқаро кўргазма ўтказишни режалаштирмоқда

Тошкент. 13 феврал. ЎзТАГ – Ўзбекистон тўқимачилик бўйича йиллик халқаро кўргазма ўтказишни режалаштирмоқда, деб хабар беради Ўзбек телеграф агентлиги (ЎзТАГ).

“Ўзбекистон Республикаси Инвестициялар ва ташқи савдо вазирлиги Ташқи ишлар вазирлиги, “Ўзтўқимачиликсаноат” уюшмаси билан биргаликда Ўзбекистонда бир йилда камида бир маротаба тўқимачилик тадбирларини жаҳон календарига киритган ҳолда тўқимачилик ва мода индустрияси халқаро кўргазмалари ўтказилиши чораларини кўрсин”, - дейилади президентнинг “Тўқимачилик ва тикув-трикотаж саноатини ислоҳ қилишни янада чуқурлаштириш ва унинг экспорт салоҳиятини кенгайтириш чора-тадбирлари тўғрисида​”ги қарорида.

Ҳужжатга мувофиқ, Ўзбекистон Европа Иттифоқи, Туркия, Koрея, Xитой ва бошқа мамлакатлар билан кўриб чиқилаётган келишувларга миллий тўқимачилик маҳсулотларига нисбатан божхона тўловларини камайтириш ва тартибга солишнинг нотариф чораларини соддалаштириш масалаларини киритишни режалаштирмоқда.

Шунингдек, Ўзбекистонда уч ой муддатда тўқимачилик ва тикув-трикотаж саноати корхоналарининг ягона ахборот порталини ишлаб чиқилади. Унда тармоққа доир тендерлар, кўргазмалар ва ярмаркалар, шу жумладан, хорижий, рўйхати чоп этилади.

Яратилган сайтда кичик тадбиркорлик субъектлари тўқимачилик ва тикув-трикотаж саноати маҳсулотларини экспорт қилишнинг тўлиқ жараёнига масофавадан ўқитилади.

Бундан ташқари, порталда тўқимачилик ва тикув-трикотаж саноати ишлаб чиқарувчилар ва хизматлар, материаллар ва хом ашё етказиб берувчилар жойлашуви кўрсатилган Ўзбекистоннинг интерактив харитаси жойлаштирилади.

Сурат манбаи: advantex.uz