Ўзбекистон ўзбек қишлоқ хўжалиги маҳсулотларини АҚШга етказиб бериш бўйича қўшма лойиҳаларни амалга оширишни режалаштирмоқда

Тошкент. 25 октябр. ЎзТАГ – Ўзбекистон АҚШга қишлоқ хўжалиги маҳсулотларини етказиб бериш бўйича қўшма лойиҳаларни амалга оширишни режалаштирмоқда, деб хабар беради Ўзбек телеграф агентлиги (ЎзТАГ).

Хусусан, бу вазифа 23 октябрдан 1 ноябрга қадар АҚШда бўладиган Ўзбекистон Республикаси Қишлоқ ва сув хўжалиги вазирлиги делегацияси олдига қўйилган.

“Унинг таркибига Тошкент давлат аграр университети ва Андижон қишлоқ хўжалик институти ректорлари, шунингдек, Тошкент қишлоқ хўжалиги ирригацияси ва механизацияси институти ва Самарқанд қишлоқ хўжалик институти раҳбарияти кирган”, - дейилади Ўзбекистон Ташқи ишлар вазирлиги матбуот хизмати хабарида.

Ташрифнинг мақсади мамлакатимиз қишлоқ хўжалиги соҳасида АҚШ илғор технология ва инновацияларини жорий этиш соҳасида Ўзбекистон ва АҚШ ўртасидаги ҳамкорликни янада мустаҳкамлаш, шунингдек, икки томонлама ОТМаро ҳамкорликни кенгайтиришдан иборат.

“Ўзбекистоннинг АҚШдаги элчихонаси маълумотларига кўра, ушбу ташриф дастурида Вашингтонда бир қатор учрашувлар режалаштирилган. Ўзбекистон делегациясининг АҚШ Қишлоқ хўжалиги вазирлигидаги музокараларда қишлоқ хўжалигига америка инвестицияларни жалб қилиш, шу соҳада мутахассисларнинг ўзаро ташрифларини ташкил этиш истиқболлари, АҚШга ўзбек қишлоқ хўжалиги маҳсулотларини етказиб бериш бўйича лойиҳаларни муҳокама қилинади”, - дейилади хабарда.

Айни пайтда, делегация таълим муассасалариаро ҳамкорликни янада ривожлантириш юзасидан музокаралар ўтказиб олиш Мичиган ва Огайо штатлари университетларига ташриф буюради. “Ушбу таълим муассасалари агро-саноат комплексида мутахассислар тайёрлашга ихтисослашган АҚШнинг энг йирик университетлардан саналади. Улар қишлоқ хўжалиги тадқиқотлари соҳасида жиддий илмий-техник ва технологик базага эга бўлиб, дунёнинг энг нуфузли олий таълим муассасалари рейтингида етакчи ўринларга эга”, - деб хулоса қилинади хабарда.