Ўзбекистонда АЭС қурилиши дирекциясининг раҳбари тайинланди

Тошкент. 14 феврал. ЎзТАГ – Ўзбекистонда атом электростанцияси (АЭС) қурилиши дирекциясининг раҳбари тайинланди, деб хабар беради Ўзбек телеграф агентлиги (ЎзТАГ).

“Отабек Тўлқинович Аманов Энергетика вазирлиги ҳузуридаги Атом энергетикасини ривожлантириш агентлигининг Атом электр станцияси қурилиши дирекцияси директори этиб тайинланди”, - дейилади адлия вазирлиги матбуот хизматининг хабарида.

Эслатиб ўтамиз, олдин О. Аманов “Ўзтрансгаз” компанияси раисининг капитал қурилиш ва таъминот бўйича ўринбосари бўлиб ишлаган.

Вазирлар Маҳкамаси ҳузуридаги “Ўзатом” агентлиги президентнинг 2018 йил июлидаги “Ўзбекистон Республикасида атом энергетикасини ривожлантириш бўйича чора-тадбирлар тўғрисида”ги фармонига мувофиқ ташкил этилган. Феврал ойида эса Энергетика вазирлиги ихтиёрига берилган.

Сурат манбаи: total.kz