Ўзбекистонда қишлоқ хўжалик уруғларини саралаш ускунаси ихтиро қилинди
Тошкент. 18 июн. ЎзТАГ - Тошкент Тўқимачилик ва енгил саноат институти ходимлари томонидан қишлоқ хўжалик экинлари уруғларини саралаш учун қурилма ихтиро қилинди, деб хабар беради Ўзбек телеграф агентлиги (ЎзТАГ) республика Интеллектуал мулк агентлиги сайтидаги маълумотга асосланган ҳолда.
Янги модел қишлоқ хўжалиги ва пахтани қайта ишлаш саноатида фойдаланиш учун мўлжалланган. Унинг вазифаси ишлаб чиқариш унумдорлигини кўтариш, уруғларни фракциялар бўйича тақсимлаш аниқлигини ошириш, ресурсларни тежашдан иборат.
Ишланма таркибига юклаш қурилмаси, барабан кўринишига эга ишчи орган, пружина илгак билан таъминланган уруғ қатлами қалинлигининг регулятори, тозалаш чўткаси, тақсимот маҳсулотларининг қабул қилгичлари киради. Барабан ичи бўш қилиб ясалган бўлиб, унинг юзаси бўйлаб жойлашган резина парраклар билан таъминланган. Парраклар орасида тешиклар очилган. Барабаннинг чеккаларидан бирида ўқсимон тешик бажарилган бўлиб, у барабаннинг ички бўш қисмини босим регулятори билан таъминланган компрессор найчаси билан улайди.
