Ўзбекистонда “Парламент назорати тўғрисида”ги қонун кучга кирди

Тошкент. 13 апрел. ЎзТАГ – Ўзбекистонда президенти томонидан 11 апрелда имзоланган “Парламент назорати тўғрисида”ги қонун кучга кирди, деб хабар беради Ўзбек телеграф агентлиги (ЎзТАГ).

Қонун Олий Мажлис Қонунчилик палатаси томонидан 10 мартда қабул қилиниб, Сенат уни 31 мартда тасдиқлаган.

Қонунга биноан, парламент назоратининг субъект ва объектлари аниқлаштирилган, унинг шакллари белгиланган, парламент назорати натижалари бўйича қабул қилинадиган чоралар регламентлаштирилган.

Жумладан, парламент назорати субъектларига Олий Мажлис палаталари, палаталар қўмиталари (комиссиялари), сиёсий партиялар фракциялари, депутатлар гуруҳлари, депутатлар ва сенаторлар, шунингдек, Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) киритилган.

Парламент назоратининг шакллари аниқ белгиланган. Булар мамлакатни ижтимоий-иқтисодий ривожлантириш юзасидан Бош вазир ҳисоботи, ҳукумат аъзолари ахбороти, Ҳисоб палатаси, Бош прокурор, Табиатни муҳофаза қилиш давлат қўмитаси, Марказий банк ҳисоботларини эшитиш кабилардир.

Шунингдек, парламент сўрови, депутат ва сенатор сўрови, қонун ҳужжатлари ижро этилаётганлигини ўрганиш, қабул қилинган қонунларни ижро этиш мақсадида қонуности ҳужжатлари қабул қилинишини мониторинг қилиш, парламент текшируви бошқалар каби шакллари ҳам белгилаб берилган.

Шунингдек, қонунда парламент назорати натижалари бўйича қабул қилиниши мумкин бўлган ташкилий-ҳуқуқий чоралар ҳамда парламент назорати ва давлат органлари субъектларининг уни амалга ошириш жараёнидаги мажбуриятлари белгилаб берилган.