Ўзбекистонда янги “Пойтахт банк” очилмоқда
Тошкент. 15 март. ЎзТАГ – Тошкентда “Пойтахт банк” акционерлик тижорат турар жой-қурилиш жамғарма банки ташкил этилмоқда, деб хабар қилади Ўзбекистон Марказий банки матбуот хизмати.
“Мамлакат Президентнинг (Шавкат Мирзиеевнинг – ЎзТАГ) 13 мартдаги “Тошкентда 2017-2021 йилларда арзон кўп квартирали уйларни қуриш миқёсини кенгайтириш бўйича қўшимча чора-тадбирлар тўғрисида”ги қарорига мувофиқ, Тошкент шаҳри, Беруний кўчаси 43-уйда жойлашувчи “Пойтахт банк” акционерлик тижорат турар жой-қурилиш жамғарма банки ташкил қилинмоқда”, - дейилади матбуот хизмати хабарида.
Таъкидланишича, “Пойтахт банк”нинг низом капитали бошланғич улуш сифатида пойтахтнинг маҳаллий бюджети ҳисобидан 3 млрд сўмни йўналтириш, шунингдек, юридик ва жисмоний шахслар, шу жумладан, хорижий инвесторларни жалб этишни ҳисобга олган ҳолда 10 млн евродан кам бўлмаган миқдорда шакллантирилади.
Низом капитали шакллантирилиб, зарур хужжатлар топширилгач Марказий банк банкни белгиланган тартибда давлат рўйхатидан ўтказади ва хорижий валютада операциялар ўтказиш учун лицензия беради.
Аҳоли ва юридик шахсларнинг турар-жойга бўлган эҳтиёжини қондиришда ипотека кредитларини ажратиш ва банк хизматларини кўрсатиш янги молия муассасасининг асосий вазифаларидан бири бўлади.
Шунингдек, банк арзон кўп квартирали уйларни қурувчи пудратчи ташкилотларга кредит ресурсларини ажратиш билан шуғулланади.
Бундан ташқари, янги банк Тошкентда кўп қаватли уйларни қуриш ва таъмирлаш билан шуғулланувчи ихтисослашган пудратчи ташкилотларга кредитлар ажратиш ва лизинг хизматларини кўрсатиш, муҳандислик инфратузилмалари сифатини яхшилашни кўзда тутувчи лойиҳаларни ишлаб чиқиш ва амалга оширишни молиялашни ўз ичига олган инвестицион фаолиятни олиб боришни амалга оширади.
Қарорда айтилишича, “Пойтахт банк” арзон кўп квартирали уйлар қурилишини молиялашда хорижий инвестициялар, жумладан кредитларни жалб этиш, халқаро молия институтлари билан техник ҳамкорлик олиб бориш билан ҳам шуғулланади.
Шу билан бирга, янги банк замонавий, фойдали, энергия тежовчи ва харидоргир қурилиш материаллари ва ускуналарини ишлаб чиқарувчи ташкилотларга кредитлар ажратиш ҳамда универсал тижорат банки сифатида юридик ва жисмоний шахсларга бошқа банк хизматларини кўрсатишни ҳам амалга оширади.
