Moody's агентлиги “Ўзбекинвест” компанияси рейтингини тасдиқлади
Тошкент. 21 ноябр. ЎзТАГ – 2016 йилнинг ноябр ойида “Moody's Investors Service Ltd” халқаро рейтинг агентлиги (Буюк Британия) «Ўзбекинвест» экспорт-импорт миллий суғурта компаниясининг халқаро молиявий рейтингини “барқарор” прогнози билан Ba3га баҳолади.
Ширкат маълумотларига кўра, ушбу нуфузли ташкилот томонидан компания рейтинги илк марта 2009 йилда В1га баҳоланган эди ва компаниянинг ўтган йиллар давомидаги фаолиятида эришилган ижобий натижалари ушбу рейтингни Ba3га кўтарилишига хизмат қилди.
Рейтинг агентлиги таҳлилчиларининг фикрича, компания кўрсаткичларининг доимий ўсиши, хусусан суғурта мукофотларини йиғиш, ўз фаолиятини диверсификациялаш бўйича барқарор ўсиш кўрсаткичлари, шунингдек, суғурта портфели капитализациясининг юқори даражаси, миллий суғурта бозоридаги кучли ўрни, компания улушида давлатнинг иштироки ва шу каби бошқа омиллар “Ўзбекинвест” компаниясининг халқаро рейтинги барқарорлигини таъминлашда муҳим омил бўлган.
